ကားမောင်းရင်းရတဲ့ သင်ခန်းစာ (၁၀)ချက်

ကားတစ်စီးကို မောင်းပြီး လိုရာခရီးတစ်ခုကို သွားရတာဟာ တွေးကြည့်ရင် ဘ၀တစ်ခုကို ဖြတ်သန်းရသလိုပါပဲ။ ရန်ကုန်လို နေရာတကာ ကားကြပ်နေတဲ့ မြို့မှာ မောင်းရတော့ အကြပ်အတည်းတွေကြားထဲမှာ ရှင်သန်ရပ်တည်နေရတဲ့ ဘ၀တစ်ခုနဲ့ ပိုလို့တောင် တူနေပါသေးတယ်။ အဲဒီလို ကားမောင်းရင်းနဲ့ မြင်နေတွေ့နေရတာတွေဟာ ကျွန်တော်တို့ဘ၀အတွက် ယူတတ်ရင် သင်ခန်းစာတွေချည်းပါပဲ။
၁။ ရည်မှန်းချက်ရှိဖို့ လိုတယ်
ကားပေါ်စတက်ပြီး စက်နှိုးတော့မယ်ဆိုတာနဲ့ အရင်ဆုံးသိထားဖို့ လိုတာက “ဘယ်သွားချင်တာလဲ” ဆိုတာပါပဲ။ ကိုယ်ဘယ်ကိုအရောက်သွားချင်တယ်ဆိုတာ သိထားတော့မှ ဘယ်လမ်းကြောင်းတွေက သွားလို့ရတယ်၊ ဘယ်လမ်းကတော့ အမြန်ဆုံးနဲ့ အဆင်ပြေဆုံးဖြစ်မယ်ဆိုတာကို ရွေးချယ်လို့ ရတာပါ။ ရှောင်ကိုဗေးရဲ့ စကားနဲ့ ပြောရရင်တော့ “Begin with the end in mind” စိတ်ထဲမှာ ကိုယ်နောက်ဆုံးရောက်ချင်တဲ့ပန်းတိုင်ကို မှတ်ပြီး ကိုယ့်ရဲ့ ခရီးကို စတင်နိုင်ဖို့လိုပါတယ်။
၂။ Early bird catches the worms
စောစောထတဲ့ငှက်က အစာပိုရတယ်ဆိုတဲ့ စကားပုံလိုပါပဲ။ ရုံးကို (၉)နာရီတက်ရမယ်ဆိုရင် အနားနီးမှ ကပ်ထွက်လို့ မရပါဘူး။ စောစောထွက်မှ ရပါတယ်။ ၁၅မိနစ်စာလောက် နောက်ကျသွားလိုက်တာနဲ့ ရုံးတက်ချိန်တစ်နာရီလောက်ထိ နောက်ကျသွားနိုင်ပါတယ်။ ဘ၀မှာလည်း ဒီလိုပါပဲ၊ အထူးသဖြင့်တော့ ဒီလိုအပြိုင်အဆိုင်များလှတဲ့အချိန်မျိုးမှာ ၀ီရိယအား ပိုသာတဲ့သူက အောင်မြင်ဖို့အခွင့်အလမ်း ပိုများပါတယ်။
၃။ မှားသွားမှာ မကြောက်နဲ့
ကိုယ်သွားချင်တဲ့နေရာကို ရောက်ဖို့ အဆင်ပြေဆုံးလို့ ထင်ရတဲ့ လမ်းကြောင်းကို ရွေးပြီး သွားလိုက်ပေမဲ့ မမျှော်လင့်တဲ့ အကြောင်းတခုခုကြောင့် ကားပိတ်နေတာမျိုးတွေ ကြုံရဖူးမှာပါ။ အဲဒီအခါ ‘ငါတော့ ဒီလမ်းက လာမိတာမှားပြီ’ ဆိုပြီး နောင်တရနေလို့ မထူးပါဘူး။ လက်ရှိဒီအနေအထားကနေ အမြန်ဆုံးရောက်အောင် ဘယ်လိုလုပ်ရမလဲဆိုတာကိုသာ စဉ်းစားကြရမှာပါ။
ရွေးချယ်မှုဆိုတာ အဖြေတစ်ခုထွက်လာပြီးမှ လုပ်ရတာမဟုတ်ပါဘူး။ အဖြေမထွက်ခင်မှာ အကောင်းဆုံးလို့ ထင်ရတဲ့အရာတစ်ခုအတွက် လောင်းကြေးထပ်ရတာဟာ ‘ရွေးချယ်မှု’ ဖြစ်ပါတယ်။ ဒါကြောင့် ဘယ်လောက်ပဲသေချာပါတယ်ပြောပြော၊ အချိန်မရွေး အကြောင်းပြချက်မျိုးစုံနဲ့ လွဲချော်သွားနိုင်ပါတယ်။ အဲဒီအတွက် စိတ်ပျက်နေစရာ မလိုပါဘူး။ ရွေးချယ်တဲ့အချိန်တုန်းက ကိုယ်တိုင် အကောင်းဆုံးရွေးချယ်မှုတစ်ခု လုပ်ခဲ့ဖို့နဲ့၊ လမ်းမှားခဲ့တဲ့အတွက် သွားရတဲ့အချိန် ကြာရင်သာကြာသွားပါစေ၊ တစ်နေ့ရောက်ကိုရောက်ရမယ် ဆိုတဲ့စိတ်မျိုး ရှိနေဖို့ကသာ အရေးကြီးတာပါ။
၎။ အခွင့်အလမ်းကို ရအောင်ယူ
အ၀ိုင်းပတ်တွေရောက်တဲ့အခါ လုံးလုံးလျားလျား ကားရှင်းမှထွက်မယ်ဆိုရင်တော့ အဲဒီနေရာမှာတင် တစ်နေကုန်သွားဖို့ ရှိပါတယ်။ ဟိုဘက်က လာနေတဲ့ကားတွေရဲ့ အရိပ်အခြည်ကို ကြည့်ပြီး ပေါ်လာတဲ့ အခွင့်အလမ်းကို အမိအရ ဆုပ်ကိုင်နိုင်ဖို့ လိုပါတယ်။ တစ်ခါတစ်လေ စွန့်စားသင့်ရင်လည်း စွန့်စားရပါတယ်။ အရာရာ အဆင်ပြေနေတဲ့ confort zone ထဲမှာပဲ တစ်သက်လုံးနေချင်လို့ မရပါဘူး။
အခွင့်အရေးဆိုတာ ကိုယ့်ဆီ ဆိုက်ဆိုက်မြိုက်မြိုက် ရောက်မလာတတ်ပါဘူး။ လိုချင်တဲ့ကိုယ်ကသာ မတွေ့တွေ့အောင် လိုက်ရှာယူရတာ ဖြစ်ပါတယ်။
၅။ ကိုယ့်အတွက် အလျှော့ပေးပါ
တစ်ခါတစ်လေကျ ဟိုဘက်က လာတဲ့ကားနဲ့ ဒီဘက်က လာတဲ့ကား ခေါင်းချင်းဆိုင်နေကြပြီး သူလည်းသွားမရ၊ ကိုယ်လည်းကွေ့မရ ဖြစ်နေကြတာတွေလည်း တွေ့ဖူးမယ်ထင်ပါတယ်။ အဲဒီသင်ခန်းစာလေးက မပြေလည်တဲ့ ချစ်သူရည်းစားတွေကနေ နိုင်ငံရေးပြဿနာတွေထိ အသုံးချလို့ ရပါတယ်။
လူတွေဟာ ပြဿနာတစ်ခုကို အဖြေရှာတဲ့နေရာမှာ ကိုယ့်အတ္တကိုပဲ ရှေ့တန်းတင်တတ်ကြပါတယ်။ ဒါပေမဲ့ စိတ်မကောင်းစရာတစ်ခုက အဲဒီလိုအတ္တကို ရှေ့တန်းတင်ထားပေမဲ့ သူလိုချင်တာရော ရရဲ့လားဆိုတော့ မရပါဘူး။ ငါမှငါလို့သာ မာန်တင်းထားပေမဲ့ သူကိုယ်တိုင်လည်း ရှေ့ဆက်သွားလို့ မရပါဘူး။ ငါမသွားရသလို မင်းလည်းမသွားနဲ့ ဆိုတဲ့အနေအထားဟာ နှစ်ဦးနှစ်ဖက် ဘယ်သူမှအကျိုးမရှိတဲ့ အနေအထားမျိုးပါ။ ညှိနှိုင်းအဖြေရှာတတ်ဖို့ လိုပါတယ်။ တစ်ခါတစ်လေကျ သဘောထားကြီးကြီးနဲ့ အလျှော့ပေးလိုက်ရလို့ ငါရှုံးနိမ့်သွားပြီလို့တော့ မထင်လိုက်ပါနဲ့၊ အဲဒါက သူ့အတွက်တင်မဟုတ်ဘဲ ကိုယ့်အတွက်လည်း အကျိုးရှိသွားစေတယ်၊ တက်လမ်းပွင့်သွားစေပါတယ်။
၆။ လမ်းသစ်ဖေါက်သူ ဖြစ်ပါစေ
ကိုယ်လိုချင်တဲ့ခရီးကို သွားတဲ့အခါမှာ ခုဆိုရင် အဓိကလမ်းမကြီးတွေမှာ ကုန်းကျော်တံတားတွေ ဆောက်နေကြသလို၊ လူသုံးများတဲ့လမ်းတွေလည်းဖြစ်တော့ ကားအရမ်းကြပ်ပါတယ်။ အဲ့လိုမဟုတ်ဘဲ လမ်းကျဉ်းလေးတွေ၊ လူသိပ်မသိ၊ သိပ်မသုံးတဲ့ လမ်းတွေကနေ သွားတတ်မယ်ဆိုရင်တော့ ကားသိပ်မပိတ်ဘဲ စိတ်အေးသက်သာစွာနဲ့ လိုရာခရီးကို သွားနိုင်မှာဖြစ်ပါတယ်။
အဲဒါဟာ စီးပွါးရေးသဘောနဲ့ ပြောရရင်တော့ Blue Ocean Strategy ပေါ့။ ဘုရားပွဲတွေမှာ ကြည့်လိုက်ပါ၊ သူများတွေ ဒီမုန့်ရောင်းတယ်ဆို ကိုယ်လည်း ဒါမျိုးလိုက်ရောင်းတယ်၊ အဲဒီအခါ ဒီစားသုံးသူတစ်စုကိုပဲ သူရကိုယ်ရ အပြိုင်လုနေရတယ်။ အဲဒီလိုမဟုတ်ဘဲ သူကအသားကင်ရောင်း၊ ကိုယ်ကအအေးရောင်းမယ်ဆိုရင်တော့ သူနဲ့ကိုယ်နဲ့ အပြိုင်လုစရာ မလိုဘဲ အေးအေးချမ်းချမ်း စီးပွါးရှာနိုင်မှာဖြစ်ပါတယ်။ Profession တစ်ခု ရွေးချယ်တော့မယ်ဆိုလည်း ဒီအတိုင်းပါပဲ။ လိုအပ်ချက်လည်း ရှိနေပြီး လူအများသိပ်မလုပ်ကြတဲ့ အလုပ်မျိုးကို ကိုယ်ကလည်း တကယ်ဝါသနာပါခဲ့မယ်ဆိုရင် ရဲရဲရွေးချယ်ကြဖို့ လိုပါတယ်။
၇။ လူမိုက်ဆိုလျှင် ရှောင်သွေလွဲလို့
ရုပ်ရှင်တစ်ကားထဲမှာ ပြောဖူးသလိုပါပဲ။ အိမ်ထောင်သည်ဆိုတာ ကားဒရိုင်ဘာလိုပဲ၊ ကိုယ့်ဘက်က မမှားအောင်လည်း သတိထားရသလို၊ တစ်ဖက်က မှားလာမှာကိုလည်း သတိထားရှောင်တတ်ရတယ် တဲ့။ တကယ်တော့ အိမ်ထောင်သည်မှ မဟုတ်ပါဘူး။ အားလုံးနဲ့ဆိုင်ပါတယ်။ မြတ်စွာဘုရားဟောတဲ့ (၃၈)ဖြာမင်္ဂလာထဲက ထိပ်ဆုံးမှာပါတာ ‘အသေ၀နာစ ဗာလာနံ’ လူမိုက်ကို မပေါင်းသင်းရ။ ဒီမင်္ဂလာတရားက ကလေးဘ၀ကတည်းက စကျင့်သုံးရမဲ့မင်္ဂလာတရားပါ။ လူငယ်ဘ၀မှာလည်း အပေါင်းအသင်းမမှားဖို့ အရေးကြီးတယ်။ အဲဒီလိုပဲ၊ လူကြီးဘ၀မှာလည်း နောက်ကျော ဓါးနဲ့ထိုးတတ်သူကို မယုံမိဖို့ အရေးကြီးပါတယ်။
၈။ ကမ္ဘာကြည့် ကြည့်တတ်ပါစေ
တစ်ရက် ရန်ကင်းစင်တာရှေ့မှာ ဘတ်စ်ကားကြီးတစ်စီးက တော်တော်နဲ့မထွက်ဘဲ ပိတ်ရပ်ထားပြီး ခရီးသည်စောင့်တင်နေတယ်။ သူ့နောက်မှာ တန်းစီနေတဲ့ ကားသေးတွေက ရှေ့ကိုလည်း ဘာမှမမြင်ရတော့ ကားပိတ်နေတယ်အမှတ်နဲ့ စောင့်နေကြတာပေါ့။ တော်တော်ကြာလာတော့ မသင်္ကာလို့ ကျော်တက်ပြီး သွားလိုက်တော့မှ ရှေ့မှာ ဘာကားမှမရှိဘဲ ရှင်းရှင်းလင်းလင်း သွားလာနေကြတာကို တွေ့လိုက်ရတော့တယ်။
ကျွန်တော်တို့ပြည်သူတွေရဲ့ အဖြစ်ကလည်း အဲဒီကားလေးတွေလိုပါပဲ။ အာဏာရှင်တွေက ကျောင်းသားတွေ ပညာတတ်သွားရင်၊ ပြည်သူတွေ အသိအမြင်ရှိသွားရင် သူတို့ထင်သလိုအုပ်ချုပ်လို့မရတော့မှာ စိတ်ပူပြီး ပြည်သူတွေရဲ့ ပညာရေးအဆင့်အတန်းကို ဖျက်ဆီးခဲ့ကြတယ်၊ အသိပိတ် အမြင်ပိတ် ဖြစ်နေအောင် နည်းမျိုးစုံနဲ့ ကန့်သတ်ချုပ်ချယ်ခဲ့ကြတယ်။ အဲဒီလို နွားခြေရာခွက်ထဲ အနေကြာလာတော့ အပြင်မှာ ဘာတွေဖြစ်လို့ ဖြစ်နေမှန်း မသိတော့ဘူး။ ဖုန်းဆင်းမ်ကဒ်တစ်ခုကို ၁၅၀၀ လောက်နဲ့ ကိုင်လာနိုင်တာကို တိုးတက်လှပြီ ထင်လာတယ်။ ကားဈေးတွေကျလာတာ အစိုးရရဲ့ ပြုပြင်ပြောင်းလဲမှုကြောင့်လို့ ထင်နေကြသူတွေကလည်း မနည်းဘူး။ ဒီလိုကိုယ့်ရှေ့ပိတ်ရပ်ထားပြီး သူတို့အကျိုးအတွက်ပဲ လုပ်နေတဲ့ ဘတ်စ်ကားကြီးတွေရဲ့နောက် ပျော်ပျော်ကြီးတန်းစီရင်း သေဖော်သေဖက် ညှိနေလိုက်ကြတာ အီသီယိုးပီးယား ကိုယ့်ကို ကျော်တက်သွားတာတောင် မသိလိုက်ကြဘူး။
၉။ တန်ရဲ့လား
ကားကိုမြန်မြန်မောင်းလို့ အရှိန်မထိန်းနိုင်ဘဲ လူကိုတိုက်မိရင်း၊ ကားအချင်းချင်း တိုက်မိရင်း အသက်ဆုံးရှုံးရတာတွေ မြင်ရတိုင်း တွေးမိပါတယ်၊ အဲဒီလိုမောင်းလိုက်လို့ ဘယ်လောက်များ စောရောက်သွားမှာမို့လို့လဲ၊ အဲဒီလို နည်းနည်းလေးစောရောက်ဖို့အတွက် ကြီးကြီးမားမား ပေးဆပ်လိုက်ရတာ တန်ရဲ့လား ဆိုတာပါပဲ။
ကျွန်တော်တို့တွေဟာ ဘ၀မှာလည်း ဘာမဟုတ်တာလေးတွေအတွက်နဲ့ အများကြီးဆုံးရှုံးနေကြရတယ်ဆိုတာကို သတိမထားမိကြဘူး။ စကားလေးအသာရချင်တာနဲ့ တစ်သက်လုံး ခင်မင်လာတဲ့ သူငယ်ချင်းကို ဆုံးရှုံးလိုက်ရတယ်၊ မာနလေးမလျှော့ချင်တာနဲ့ပဲ အိမ်ထောင်ရေးတွေ ပျက်စီးကုန်တယ်၊ ငါဆိုတဲ့အတ္တလေးအတွက် ပညာပြရင်း လုပ်ဖော်ကိုင်ဖက်တွေနဲ့ ဆက်ဆံရေး ပြတ်တောက်ခဲ့ရတယ်။
ဒါကြောင့် တခုခုကို စိတ်လိုက်မာန်ပါ ဆုံးဖြတ်မိတော့မယ်၊ လုပ်မိတော့မယ်ဆိုတဲ့အချိန်တိုင်း ကိုယ့်ကိုကိုယ် ပြန်မေးကြည့်စေချင်တယ်၊ ဒီအလဲအထပ်ဟာ တန်ရဲ့လား လို့။
၁၀။ အဆုံးသတ်တွေ လှပဖို့
ကားပါကင်ပြဿနာကြုံတွေ့နေရတဲ့ ရန်ကုန်မြို့မှာတော့ တစ်ခါတစ်လေ လိုရာခရီးကို ရောက်နေပေမဲ့ အဲဒီပါလာတဲ့ကားကို ရပ်စရာနေရာမရှိလို့ တ၀ဲလည်လည်ရှာနေရတဲ့အဖြစ်မျိုးလည်း ကြုံရပြန်ပါသေးတယ်။ ကိုယ်ပိုင်ကားနဲ့မလာဘဲ တက္ကစီစီးလာတာက ရပ်စရာနေရာရှားပါးနေတဲ့ ခုလိုအချိန်မှာ ပိုအဆင်ပြေတတ်ပါတယ်။
ကျွန်တော့်မိဘများအပါအ၀င် မိဘတိုင်းကို အဲဒါလေး သတိရစေချင်ပါတယ်။
ကိုယ်ပိုင်ကားလို့ခေါ်တဲ့ အနှောင်အဖွဲ့တစ်ခု ပါလာခဲ့ရင် လိုရာခရီးကိုရောက်ဖို့ အဆုံးသတ်မှာ နှောင့်နှေးနေတတ်သလို သံယောဇဉ်တွေ အစွဲအလမ်းတွေ များနေခဲ့ရင်လည်း လူ့ဘ၀ရဲ့အဆုံးသတ်မှာ ဒုက္ခရောက်တတ်ပါတယ်။
လူ့ဘ၀တစ်ခုကို ဖြတ်သန်းရခြင်းရဲ့ နောက်ဆုံးပန်းတိုင်က ဘာပါလဲ။ စဉ်းစားကြည့်ပါ၊ သားသမီးတွေကို ကျွေးမွေးစောင့်ရှောက်ဖို့သက်သက်ပဲလား။ ဘ၀တစ်လျှောက်လုံး လုပ်ပေးလာခဲ့လို့ သားသမီးတွေလည်း ကိုယ့်ခြေထောက်ပေါ် ကိုယ်ရပ်နေနိုင်ကြပြီဆိုရင်တော့ ကိုယ့်အတွက် တစ်ချက်တော့ ကြည့်သင့်နေပါပြီ။ သံယောဇဉ်တွေ၊ အစွဲအလမ်းတွေ လျှော့နိုင်သလောက် လျှော့ပြီး ကိုယ့်ဘ၀ကိုကိုယ် လှလှပပ အဆုံးသတ်နိုင်ဖို့ အားထုတ်ကြစေချင်ပါတယ်။